Духовенству Львівської єпархії, благословляю включити в щоденну службу «Канон молебний до священномученика Харалампія в час пошесті творимий».
+ФІЛАРЕТ
Митрополит Львівський і Галицький
Творіння преподобного Никодима Святогорця
Песнь 1: Колесницегонителя фараона:
Видяще поветрие, ныне нашедшее на рабы твоя, всяку лечбу и хитрость врачебную побеждающее, с верою теплою прибегаем под святый кров твой, священномучениче Харалампие: ускори на помощь нам, в опасности сущим.
Якоже другий Аарон, Харалампие, посреде живых и мертвых став, бремя нестерпимое нынешния смерти уйми; молитв же твоих, отче, кадило принес, гнев Господень прекрати (ср. Числ. 16, 46-48).
Всегубительство страшное видя человекоубийственнаго поветрия, священниче Господень, славне Харалампие, умилостивися и ускори умилостивити утробы Бога, естеством милостиваго, яже противу себе прогневахом.
Богородичен: Година зол, година гнева охвати ны несчастныя: поветрие бо вся, яко траву, посече. Марие матеродевственная, тецы и скоро упреди, и Сына Своего умилостиви к нам, безмерно согрешившим.
Песнь 3: Небеснаго круга:
Животворен сый благоуханьми молитв твоих, святе, отжени поветрием растлившийся воздух, егоже вдыхающе земли сея жителие смерть болезненную скоро получают.
Якоже класы сечет острый серп, тако поветрие пожинает человеки вся. Мучениче Харалампие, пресеки сего губительство, и смерти избави прибегающих к тебе.
Удалихомся, увы нам, от обычныя жизни, и от всяческаго друг ко другу общения затворихомся страхом всегубительства: ты убо, святе, сей упразднив, соедини ны скоро ходатайствы твоими.
Богородичен: Виждь, Владычице мира, виждь злоключение людей, искупленных честною Сына Твоего Кровию, и ущедривши Сего яко Мати милосердая, поветрия избави всегубящаго.
Песнь 4: Ты моя крепость, Господи:
Идеже осеняет божественная благодать твоя, Харалампие, и честное твое имя призывается с верою теплою, оттуду болезнь поветрия отгоняется: тем и ныне благодать твоя да отженет сию от нас, имя твое призывающих.
Призри на ны, беды терпящия последняя, страстоносче, и милостив явися: се бо нынешнее поветрие вся ны показа бездомны блуждающа и безградны. Смерть бо в домех, смерть на стогнех, и во граде и в селении ныне смерть.
Прежде убо Давид, видя ангела умерщвляюща тысящи людей, умилостиви сего жертвою телесною: ты же, страстоносче, зря поветрие посекающее христоименитых множества, молитв твоих мысленною жертвою Бога милостива к нам соделай.
Богородичен: Мати Божия, плачи и рыдания услыши, яже раби Твои творят над мертвецы своими: трупи бо их множицею непогребенны пребывают, лежаще, увы нам, яко пища птицем и зверем. Темже умилосердися над горем их.
Песнь 5: Вскую мя отринул еси:
Всегубительство горящее и извне еще укрепляемое годиною летнею горящею, яко пещь вавилонская обретеся, пожигая абие обдержимых им. Но ты, мучениче, сие угаси.
Язва ныне десятая фараонова вся ны постиже: ныне губитель вся ны в домех наших умертви. Священниче Господень, кровь твою покажи Владыце, и прямо прогони губителя.
Поветрие, якоже пантера, Христово божественное стадо закла, пожре и растерза: но ты молитв твоих жезлом железным, Харалампие, скоро порази сие, и от сего пагубы избави нас.
Богородичен: Удобогорящее вещество злодейства наша, Дево, явишася, от негоже поветрие воспитася и вся огнем попали: Ты убо, яко Огня невещественна вместилище, вещество грех наших опали, и палящее поветрие сожжется.
Песнь 6: Молитву пролию ко Господу:
Лозу Божию благоплодную, юже от Египта темнаго, безбожнаго и блуднаго Христос изъят, поветрие, якоже кабан, пожре: Харалампие мучениче Христов, зубы сего скоро сотри.
Тебе дадеся благодать сия, святе, изряднее всех святых, поветрия всегубительнаго болезни прекращати. Обаче и ныне сию действенну соделай, скоро отгнав поветрие от нас, с верою чтущих тя.
Якоже дракона вавилонска растерза Даниил божественною хитростию, такожде и ты, о Харалампие мучениче, люди Божия погубляемыя спаси, растерзав поветрие египетское зелием молитв твоих.
Богородичен: Припадем, вернии, и восплачим, и Христу вси покаемся, от души и сердца вопиюще: пощади людей Твоих, Человеколюбче Господи, и пагубу поветрия устави, действенными Твоея Матере мольбами.
Песнь 7: Отроцы еврейстии:
Яко да тя вси восхвалим, яко да воспоем всегда имя твое, изми нас предстательствы твоими от испытания сего – поветрия всегубительнаго, о Харалампие треблаженне.
Облак смерти горчайшия покры нас, рабов твоих: дохновении молитв твоих разсей его, блаженне, и жизни чистый воздух нам возлей.
Якоже вихрь нападый, возмути все наше житие поветрие всегубительное: но ты, страстоносче, живот наш в тишину неколебиму преложи.
Богородичен: Решительнице скорби, Богородице, и пространное вместилище мира всего Радования, от скорби горькия – поветрия человекоубийственнаго – избави нас, воспевающих Тя, и радование подаждь нам.
Песнь 8: Иже в горе:
Вразумляя, якоже рабы безчинныя, Владыка нас поветрием бичует: егда же вконец вси вразумимся, преставит воспитуя ны яко Бог милости, Харалампия молитвами.
Пощади, пощади люди христоименитыя, страстоносче, и меч Господень единою вся посецающий невидимо в ножны возврати твоими действенными молитвами.
Опустошися град наш весь, и вся грады якоже селения явишася, и вся жилища опустеша поветрия страхом: егоже изгони молитвами твоими, всеблаженне.
Богородичен: Христа Мати и Мати христоименитых Ты еси, Пречистая: темже скоро нас, Твоих по благодати чад, помилуй, злоключимых, обаче же и вразумленных поветрия воспитанием.
Песнь 9: Ужасеся о сем небо:
Да престанем быти мужие губления, на седалищи губителей седящии, и злодеяний друг ко другу начальницы явившиися, всем уделяюще от душетленныя пагубы: и престанет абие поветрие плотское, истлевающее всех приближающихся к нему.
Вси мы преступихом заповеди Божия, жизнь ходатайствующия творящим я: сего ради и отмщение обретохом равноценное – нынешнюю смерть и всегубительства растление: смерть бо, якоже Павел вопиет, греха есть воздаяние (Рим. 6, 23).
Не имамы кий дар принести достоин во умоление, Харалампие, ни добродетели, ниже следа коего от исправления: слезы некия теплыя тебе принесохом от души и малая стенания, яже принеси ко Господу и поветрия избави всегубящаго.
Богородичен: Приими, Дево, ликостояния вся Ангел невещественных и всех Святых, и сотвори усердное моление к Сыну Твоему: покажи Твоя сосцы и руце, Его же – крест, губу и копие: и тако устави, Девице, поветрия болезнь всепогубляющую.
Молитва на час нинішньої пандемії
Владыко Вседержителю, Заступниче и Спасе мира, Врачу и Помощниче страждущих, Искупителю и Спасителю болящих, телесныя и душевныя скорби человеков исцеляяй, Победителю смерти!
Молим Ти ся, Боже наш, очисти и избави нас от всякия болезни и скверны плоти и духа.
Господи, не остави нас: врачебную твою силу с небесе ниспосли, всякую немощь таящуюся отжени, помози нам во время поветрия и избави нас от всякия скорби, зол и болезни, устави находящую язву, терпение же даруй нам в час сей.
Господи, восстави нас: буди врач всем нам, воздвигни нас от одра болезни и от ложа озлобления, приими мольбы врачей, сестер и всех служащих и преподающих попечение, защищение и облегчение в лечебницех сущим, укрепи их человеколюбием Твоим и утверди их силою Твоею.
Упокой в месте прохлаждения иже от лютыя сея поветренныя болезни усопших рабов Твоих, братий и сестер наших.
Восстави же нас, оставльшихся здравых и исцеленных, во Святей Твоей Церкви в поклонение и славу Всесвятаго имене Твоего.
Твое бо есть еже миловати и спасати ны, Боже наш, и тебе Славу воссылаем, Отцу, и Сыну, и Святому Духу ныне и присно и во веки веков. Аминь.
*****
Владико Вседержителю, Заступниче і Спасе світу, Лікарю і Помічнику стражденних, Іскупителю і Спасителю хворих, Цілителю тілесних і душевних скорбот людей, Переможцю смерті!
Молимося Тобі, Боже наш, очисти та визволи нас від усілякої хвороби, скверни плоті та духа. Господи, не залишай нас: надішли з небес твою лікувальну силу, усіляку віджени таємну неміч, допоможи нам в час пошесті і визволи нас від всілякої скорботи, зла і хвороби, зупини знищення, що настає, терпіння ж нам даруй в цей час.
Господи, піднеси нас: стань нам всім лікарем, підійми нас з ліжка хвороби та одра озлоблення, прийми молитви лікарів, сестер і всіх, що служать і турбуються, захищають та надають утіху тим, хто в лікарнях, і зміцни їх чоловіколюбієм Твоїм, утверди їх силою Твоєю.
Упокой в місці утіхи від цієї тяжкої пошесної хвороби спочилих рабів Твоїх, братів та сестер наших.
Воздвигни нас, тих що залишилися здоровими та зціленими у Святій Твоїй Церкві, на поклоніння і славу Всесвятого Твого Імені.
Твоє ж бо є милувати і спасати нас, Боже наш, і тобі Славу воссилаємо, Отцю і Сину і Святому Духу, нині і повсяк час і навіки вічні. Амінь.
